नेपालर्वे ङाच्यु क्रि म्हारा निप्रे साग सुखले खालई  – Tamu Times

नेपालर्वे ङाच्यु क्रि म्हारा निप्रे साग सुखले खालई 

मंसिर, पोखरा

हुम तमु (च्हाक्ली)

फुटबलर्वे म्हारा नि प्रेई नेपालई १३औ दक्षिण एसियाली खेलकुद (साग) सुखले छ्याल्ले खालैमो । त्रिपुरेश्वरर्वे दशरथ रंगशालरी खावे समारेहल्वे मार्चई क्रमरी किर्तिमारी पौडी खेलाडी गौरिका सिंहई नेपालर्वे राष्ट्रिय भण्डा नोल ।

चार स्वर्णनि ९ पदक ट्होबले कीर्तिमानी बनिइमो । सागरी नेपालर्वे लिलिवे म्हारा भे दाइमेई फुटबलरी विइमो । खावे समारोहरी ओसो तउले खेलरी नेपाल्ले भुटानलाई २–१ गोलाई ट्होउले मोल । चुनिप्रे १३औं सागरी नेपालर्वे म्हारा पदक संख्या ५१ फेलैमो । मंगलबार नै नेपालीई लागि बक्सिङरी सुनिल शाहीई म्हारा पदक विल । चर्चित खेलझोगो फुटबल, क्रिकेट नि भलिबलरी सम्भव ६ मध्ये नेपालै क्रि मात्र म्हारा पदक ट्होलखाईमो । नानिमेल्वे फुटबल नि भलिबलरी चाँदी ट्होवे  नेपालई क्रिकेटल्वे नानिमे नि दाईमे ङिनै कास्य पदक ट्होइमो । दाइमे भलिबलरी भे नेृपालै पदक ट्होउरी आखा । छलेइनै सागरी समावेश २६ खेल मध्ये नेपालई २५ खेलरी पदक ट्होइमो भे सुटिङरी पदक पखल आँखा । मार्सल आर्ट्सरी नेपालै चुपाली ताइभन्दा ले ३२ स्वर्ण ट्होइमो । च्हरी तेक्वान्दोइटो सर्वाधिक १२ कराँटेइटो १०, उसुइटो ५, बक्सिङइटो ३ जुडोइटो २ ट्होला । बक्सिङरी ङोउले स्वर्ण २० वर्षलिलिवे अ । भारोत्तोलनरी सन् २००६इलिलि ओसो चोटी ट्होउले अ । छलेइनै नेपालई साइक्लिङ, गल्फ, ट्रायथलन नि कुस्तीरी ओसोचोटी स्वर्ण ट्होइमो ।