सांसद यादवै पिइमो मानव अधिकार आयोगरी अपहरणै उजुरी – Tamu Times

सांसद यादवै पिइमो मानव अधिकार आयोगरी अपहरणै उजुरी

१८ बैशाख, पोखरा
हुम बहादुर च्हक्ली तमु
जनता समाजवादी पार्टी सांसद डा. सुरेन्द्र यादव खिलाई अपहरण लै भिईमरी नेकपा सांसद महेश बस्नेत, कृष्णकुमर श्रेष्ठ नि ओसोवे प्रहरी महानिरीक्षक सर्वेन्द्र खनाललाई राष्ट्रिय मानव अधिकार आयोगरी उजुरी दिईमो ।
बुधबार आयोग कार्यालयरी फेइमरी डा.यादवई सदस्य प्रकाश बस्ती नि मोहन अन्सारीनी प्रे त्होइमरी उजुरी प्ह्रिइमरी विइमो । उजरी प्ह्रिउले किइमरी आयोगई सदस्य प्रकाश बस्तीई उजुरी विवे म्हिई भिउदुले अपहरण तउले कि आतवउले भिवे क्ल्होरी अनुसन्धान लउ भिईमरी भिईमो ।
अपहरण तउले तया म्हि अधिकारल्वे उल्लङ्घन तम, म्हिँ अधिकार फेरी पखउरी ङी पोम खिई भिईमो । महोत्तरीरी धींरी डा. यादवई नेकपा संसाद बस्नेत, श्रेष्ठ नि ओसोवे आइजीपी खनालई बैशाख १० गते काठमाण्डौं पखउले मल ।
चै ल्याईले नेसार मेरियट होटलरी बास टिवे डा. यादवई प्हनइटो खि अपहरण लउदुले काठमाण्डौरी पखउले भिइमरी खउले मो ।
खिनी प्रे जनता समाजवादी पार्टील्वे नेताझोगा अपहरणल्वे उजुरी विउरी महानगरीय प्रहरी परिसर काठमाण्डौ नि जिल्ला सरकारी वकिल कार्यालय काठमाण्डौंरी फेला । तर ङि निकायई डा. यादवल्वे उजुरी किउरी आमादिल ।