कोरोनाइ अर्को म्हीइन सिइ,सिबा सोउलो म्ही तई ह्युल भोरिर् प्र प्लीउलो नि च्युसे ङ संक्रमित तै – Tamu Times

कोरोनाइ अर्को म्हीइन सिइ,सिबा सोउलो म्ही तई ह्युल भोरिर् प्र प्लीउलो नि च्युसे ङ संक्रमित तै

भिम तमु ,देवदह रुपन्देही
न्हेपाल ह्यलरी कोरोनाई ल्हैदिसी अर्को म्ही सिइमो । रुपन्देही जिल्लर्बा मणिग्रमार मबा क्रीमसन अस्पतालरी ह्याब जेठइ क्रीउले कुनुन मै लमनी खबा गुल्मीर् प्लीच्युसे क्री बर्षर्बा प्यु म्ही सीबा गो । च म्ही विहीबार न्हागर सिबा ताँ न्हेपाल सरकार स्वस्थ निरो जनसंख्या मन्त्रालयई विइमो । चु नि लसि न्हेपाल ह्युलरी कोरोना ल्हैदिइर सीबा म्ही सोंउलो तबा ताँ मन्त्रालायर्बा ताँबिबा म्ही विकास देवकोटाई बिइमो । निमावि खेबधींई लोबाथे मबा च म्ही ह्याबा जेष्ठ क्रीउले च अस्पतालर भर्ना तैइर च दिनाउले कुनुन आइसियुरी थेंसी मै लदिलो । कोरोना ल्हैदिब्दों ङ्हासी ङ्ही गते चै स्वाब पिसीआर ङ्ह्योबर प्रदेश जनस्वस्थ प्रयोगशाला भुमनी ह्याबा सोमवार कोरोना म्रोबा गो । चु भन्दा ओंसो कोरोना ल्हैदिइर सिन्धुपाल्चोकर्बा सुत्केरी म्रीम्ही नि बाँके नरैनापुरर्बा प्युँम्ही सिलखाइमो ।

तियाँन झापारी प्रेउलो नि लैइर कुउलोलै कोरोना ल्हैदिम्दै ह्युल भोरिर प्र प्लीउलो नि च्युसे ङ म्हीलै कोरोना ल्हैदिबा ताँ मन्त्रालायर्बा ताँबिबा म्ही विकास देवकोटाई बिइमो । झापा जिल्लै कचनाकवल गाउपालिकै लक्ष्मी प्रसाद देवकोटा खेबाधींर् मबा क्वारेन्टाइनर् मबा म्ही प्रेउलोलै कोरोना ल्हैदिबा बिइमो । धै छाइलेन रुपन्देही जिल्लार्बा प्युँ म्हीलान् कोरोनो ल्हैदिइमो । ह्युल भोरिर् त्होको सम्म प्र सोंउलो नि प्रेच्युसे सों प्युँम्ही धै ङी च्यु म्रीम्हीलै कोरोना ल्हैदिबा ताँ स्वस्थ निरो जनसंख्या मन्त्रालयई बिइमो । छाइलेन तियाँन काठमाण्डौर् मबा शुक्रराज ट्रपिकल निरो सरुवारोग अस्पतालउले कोरोना ल्हैदिवा म्ही प्लीउलो ससी तिँइ ह्याइमो । लिसों ङ्हीउलो सम्म कोरोना ङ्ह्योमनी कोरोना आम्रोबा काठमाण्डौर्बा ङ्हीउलो भक्तपुरर्बा म्ही ङ्हीउलो लै तिँया अस्पतालै तिँ कुल्म्हीबा ताँ अस्पतालै निर्देशक सागर राजभण्डारीइ बिइमो । ह्युल भोरिन् त्होको सम्म चु म्ही प्लीउलो ह्याबा लिसों कोरोनाउले सबा म्ही प्लीच्युसे कु फेनबा ताँ स्वस्थ निरो जनसंख्या मन्त्रालयई बिइमो ।