रेसी चोयावे तमुलाई मोई लउरी हङकङ नि पोखराईटो सहयोग – Tamu Times

रेसी चोयावे तमुलाई मोई लउरी हङकङ नि पोखराईटो सहयोग

असोज, पोखरा
शुक्ला गण्डकी नगरपालिका–१, थप्रेकर्वे क्रे चोयावे ङिच्यु क्रि (७१) बर्षल्वे आम बहादुर तमुलाई मोई लउरी सहयोग लैमो । हङकङ नि पोखराईरी मवे नासर्वे म्हिझोगोई देछयाल्ले मोई लवरी मुई विइमो । पोखरा–२९ फडकपुररी खिल्वे आलिल्वे च्ह तिलक तमुई धिंरि तमुलाई दे मोई लउरी (१,८५,२२७) विइमो । ओसोवे धिं थप्रेक तोको हङकङरी मवे म्हिझोगोईटो १४४८३७ नि पोखरारी टिवे म्हिझोगोईटो ४०३९० मल ।
मुई विवे कार्यक्रममरी समाजसेवी लोक बहादुर तमुई संयोजकत्वरी ओसोवे नेपाल बैङ्क लिमिटेडर्वे अधिकृत धन प्रसाद तमु, रुपताल तमु समाजल्वे अध्यक्ष सु.चेत बहादुर तमु, सुर्यमुखी तमु समाजल्वे अध्यक्ष सु. दल बहादुर तमु, थप्रेक तोल विकास समितिल्वे अध्यक्ष टल बहादुर तमु, नि सरस्वती मा.विले व्यवस्थापन समिति अध्यक्ष गणेशमान तमुझोगो खईमरी रेवे मुईझोगो विला ।
तमु जेठ ङिहच्यु कु गते म्हम्म्रोरी म्ल्ह प्लु थेउरी यामईले कुह्रर्मले रेसी चियाल । तमुलाई मोई लउरी काठ्माण्डौ मवे ग्राण्डी हस्पिटलरी फेलल । हस्पिटललई सों रेसी चोयाइमरी तोको स्टिल जोई भिईमो । दे मोई लउरी हस्पिटलई पोखरा हरियो खर्क मवे टुपि अस्पतालरी आसार ङी गते रिफर लल । तमुलाई ङिह महिना टुपि अस्पतालरी थेइमरी साउन ङिहच्यु सो गते धिंरी पखल ।
तमु व्य आलउले तैमरी तोको ल्होमिउले खाइबनी आरे । मोय लउरी उपाय तोई आतैमरी मोय लउरी छयाँब तदे भिईमरी नासर्वे गणेश तमुई नवे म्हिल्वे फोटो थप्रेक डटकम फेसबुक पेजरी जोल । थाह योइमरी तमु प्ये ल्हु संध यु.के सल्लाहकार म्हवे पूर्णविर तमुई संयोजकरी ओसो सों करोड मुई सहयोग ललखाईमो ।
सहयोग मुई योइमरी तमु वेल्ले से तैमरी म्लेकी नि भरिल । खि दुःख योमाईले बाहिर मवे नासमेई खिलाई सहयोग लमईले से तइमरी तानलाई धन्यवाद पिइमो । सहयोग पिउमेलाई सधैं छ्याँब तदे, चउरी, खेउरी, टिउरी योदे, मेउले योदे भिइमरी आशिमाला विइमो । तोको तमुई क्रेइटो मन्होइटो आचलिइमो । फो ख्रेब क्लि भे हप्ता क्रि आयुव डल्ल तैमरी युवा लैमो । ङिच्यु बर्षल्वे तमु व्य आलईमो । खिलाई तोको ल्होमिउले खाईनि आरेइमरी पोखरा माईला आलिई च्हई धिंर थेइमो । तोको चु वेलारी तमुलाई दे मोइ लउरी ले च्युकेदे तान म्हिझोगोलाई खावले सहयोग लमिनु भिईमरी ओसोवे नेपाल बैंङ्क लिमिटेडई अधिकृत धन प्रसाद तमुई भिइमो ।