हुम च्हाक्ली तमु
ङिच्यु हजार ङिच्युङि माघ ङि, पोखरा,
ओसो नेपाल स्टार फाईनलरी फेवे एलिना तमुस्योल्वे कोइ प्रिवे कार्यक्रम कन्सर्ट पोखरारी तै । एलिना तमुस्यो ट्होलउ अभियान समिति गण्डकी प्रदेशई मंगलबार पोखरारी आयोजना लवे कनसर्टरी एलिनाई खिई ब्याण्ड नि कोई प्रिल ।
एलिनाई चुओसो पोखराल्वे मुग्लान रेष्टुरेण्टरी मवे ब्याण्डई ल्होमिला । कोई प्रिम्दै एलिनाई खि नेपाल स्टारई फाईनलरी फेउरी सहयोग लवे समितिलाई लेले ज्ञजसे पिला । खि ट्होवले ताई पोखराल्वे ट्होबले तब भिईमो । पोखराल्वे साथ, सहयोग नि मायाई खिलाई ओसोवे नेपाल स्टार ट्होवे म्हि बनिब भिईमरी खि विश्वस लैमो भिई ।
कार्यक्रमरी एलिना तमु ट्होलवे अभियानल्वे समितिई संयोजक मेनकाजी तमुई समितिल्वे म्होरा छ्याँब तैर यासे मो भिईमो । “एलिना तमुई नेपाल स्टारल्वे वेल्ले छ्याँब च्यु क्रि (११) री फेईमरी मात्र खेमेई समिति गठन लबले भिला । छलेई समितिई निरन्तर विइमरी एलिनालाई नेपाल स्टार बनिउ म्होर म्रोई । तिले च म्होर पुर तबे त्ही फेखईमो । तोरे क्रि चरण मात्र मो । ङ्योलाई विश्वास मो माघ च्यु ङि (१७) गते फाईनलरी पोखराल्वे फेरि अर्काे इतिहास थेसे मो । नेपालर्वे ओसोवे नेपाल स्टार एलिना तमु तबले मो भिई” ।
तमु धिं नेपालर्वे अध्यक्ष हुम तमुई एलिना प्रतिभा मैमरी चर फेव भिई । एलिनारी देदेले पोबे कलाल्वे विकास तबले योई भिई । तेल खानि आपोवे एलिना नेपाल स्टारै कारण तिले मिडियाझोगोरी अन्तर्वार्ता विखाउले तैमो भिई । नेपाल स्टारै ताज एलिनाई नै खेबरी खि ढुक्क मो भिई ।
दुधपोखरी तमु समाजल्वे अध्यक्ष सु. मेजर मेजर हेम प्रसाद तमुई एलिना नेपाल स्टारल्ववे फाईनलरी फेइमरी तमुझोगोल्वे छाती फुलईमो भिई । खिई एलिनालाई भोटिङ माध्यमईटो फाइनलरी फेलवे तान नेपालीझोगोलाई ज्ञजसे बिईमो ।
कार्यक्रमरी गण्डकी प्रदेशल्वे सांसद इन्द्रधारा विष्ट, लोक तथा दोहोरी गीत प्रतिष्ठान गण्डकी प्रदेशल्वे अध्यक्ष सुरेन्द्र तमु, समिमिल्वे संयोजक मेनकाजी तमु, तमु धिंल्वे अध्यक्ष हुम तमु हार्माेनील्वे अध्यक्ष इतु जोजिजु, बरिष्ठ लोक गायक पदमराज ढकालई एलिनालाई सम्मान लल ।
कन्सर्टरी पोखरार्वे अरु कोई प्रिवे म्हिझोगोई नि खेमेई कोईझोगो प्रिला ।
