हुम बहादुर च्हाक्ली तमु
श्रावण ङ्हीच्यु ङा, पोखरा
नेपाल आदिवासी जनजाति पत्रकार महासंघ (फोनिज)ल्वे ङ्हीच्यु टु स्थापना दिनरी फोनिज गण्डकी ओसो नि फोनिज कास्की लिलि तैमरी मिडियारी आदिवासी जनजाती कोलपरिवे ताँ तिवे दिनरी नेपाल पत्रकार महासंघ कास्कीरी तै । च कार्यक्रमरी प्रेस काउन्सिल नेपालई सदस्य केशवशरण लामिछानेई मिडियारी आदिवासी जनजाति खलेभिले कोलपरि भिईमो । च म्हिई मिडियारी तोको ताई समुदायझोगोलाइ कोलपरिम भिईमो । तोको सञ्चार क्षेत्ररी ताई समुदायझोगो खलपरिव नि कोलपरिव तिवे त्हि अ । आदिवासी जनजातीझोगो चु क्लहोरी खले टिलल्खाँब ताँझोरी नि मेल्परिवे ताँ मो भिई । छलेई पत्रकारितालाई खले सोललखाँब भिवे ताँ खमईले ताई पत्रकारझोगो खाँवे ताँझोगोरी विकास लवे केझोरी ङ्होलपरि भिईमो ।
छलेई पत्रकार महासंघ गण्डकी प्रदेशई अध्यक्ष रमेश पौडेलई नेपारी क्ह्रइमरी टिवे ताई म्हिझोगो म्रोमैले ङ्यो सेतल्परिम भिईमो । तोको ह्यूलई आदिवासी जनजातिझोगोलाई आछ्याँब लौले आम्रोइमो भिई खनई छले लैमो भे च ताँ लवेक्ल्होरी याईमरी भिखाम भिई । आदिवासी जनजाति समुदायलाई मिडियारी च्यालउ ताँरी बहसझोगो ललपरिम भिईमो ।
फोनिज गण्डकी, कास्कीई सल्लाहकार हुम बहादुर तमुई कार्यपत्र खेम्दै ह्यूलई ताईलाई योलवे कोवे निति बनिईमरी नितिझोगो ल्हैदिलउरी पो विल्परिव ताँ भिईमो । मिडियारी कोल्परिवे नितिरी छ्याँवे ताँझोरी ओसो मले नि आदिवासी जनजातीई मेउले दुले योलईमरी कोवे नितिई भे आयोउले ताँमो भिई । छलेई नेपालरी व्यवस्था परिवर्तन तै आदिवासी जनजातिई ताँ रेइमरी खई तोको चल्वे मेउले ताँ परिवर्तन तलआँखा । सल्लाहकार तमुई भिइमो सञ्चरमाध्यमरी मौलिकताई प्रचर लैम्दै विभेद खालउरी नि ताई क्रिई तवे समाज बउरी क्ह्रिल्परिम ।
नेपाल आदिवासी जनजाति पत्रकार महासंघ गण्डकी प्रदेश अध्यक्ष खिमा तमुई अध्यक्षतारी तवे कार्यक्रमरी नेपाल पत्रकार महासंघ कास्कीई अध्यक्ष माधव बराल, फोनिज गण्डकीई सल्लाहकरा मनोज घर्ती मगर नि आदिवासी समुदायल्वे पत्रकारझोगोई सोलवे ताँझोग लम्दै क्षमता विकासई लागी नयाँ नयाँ कार्यक्रमझोगो पखल्परिवे ताँ ओसो थेईमो ।
