हुम बहादुर च्हाक्ली तमु | पोखरा |
गण्डकी प्रदेश सभाई तिवे बैठकरी गण्डकी प्रदेशरी मगर नि तमुभाषालाई सरकारी केझोगो लवे भाषा जोलपरिम भिइमरी बनिवे विधेयक पारित लैमो ।
विधेयक पारित तमईले तोरे चु ङ्हि भाषा सरकारी केझो लवे भाषा तैमो । प्रदेश न्होरी ल्हेई भाषा पोवे मगर नि तमु भाषाई संरक्षण, सम्बद्र्धन नि विकास लौरी सकारी केझोगोलाई दे छाँल्ले नि सजिलो लउरी सरकारी नि तानवे क्होईटो तवे केझोगोरी ङ्यो म्हिझोगोलाई सजिलो तदिगे भिईमरी चु विधेयक पखउले अ ।
तोरे प्रदेश सरकारई मन्त्रालय, आयोग, निर्दशनालय, कार्यालय नि जोडिव संस्थाझोरी चु ताँझोगो लव नि कार्यालयझोई सरकारी केझोगो लउरी चु भाषा क्ह्रिललपरिमो ।
देवनगरी लिपीरी प्ह्विे नेपाली भाषाई क्ल्होरी तोरे तोक्दिवे लिपीरी मगर नि तमु भाषालाई सरकारी केझोगो लवे भाषारी झोलपरिमो ।
सरकारी धिंरी सरकारै केझोगो नि धिंरी तवे ताईल्वे चैदिवे सेझोगोरी चु ङ्हि भाषारी नि लैमरी अभिलेख ललपरिमो, के लउरी खवे तमु, मगर भाषारी विवेदन, प्रमाण, काजगझोग जोमईले केझोगो तखाईसरे च भाषारी चैदिवे कागजझोगो पखलखाउले व्यवस्था विधेयकरी मो ।
प्रदेश सरकारई भाषा खेउरी, अनुसन्धान लउरी चु ताँझोगो ह्रवे चिवे म्हिझोगोलाई थेखावे व्यवस्था विधेयकरी कार्यालयई मगर नि तमु भाषारी नागरिक वडापत्र नि ताँझोगो म्रोल्ले थेवे क्ल्होरी थेलपरि भिउले मो ।
बैठकरी कांग्रेसल्वे महेश भट्टराई, सरस्वती तमु, एमालेल्वे सुधिर कुमार पौडेल, निर्मला थापा नि गणेशमान तमु, माओवादी केन्द्रल्वे कुसुम बुढा पुन नि हरिबहादुर भण्डारी, राप्रपाल्वे बिन्दु पौडेलई च विदेयकई फिर छलफलरी भाग किल ।
ह्रोसेई कोंईझोगो खेईमररी खवे तमु मगरई सांसदझोगोई विधेयक पारित तमईले प्रदेश सरकारलाई ओर्छे, ज्ञाजसे भिम्दै शुभकामना बिईमो ।
