असोज ङि, पोखरा
तमु सञ्चारकर्मी संघ, कास्कीई तमु धिं नेपालई समन्वयरी ह्ङि दिन नागरिक पत्रकारिता तालिम ओलेल । तमु धिं नेपालनिप्रे तब ताई तमु समाजझोगोल्वे म्रुमेझोगोलाई तेईमरी तालिम ओलेउले अ । समाजर्वे म्रुझोगोई नागरिक पत्रकारितालाई क्होलव नि तोको विभिन्न समाजिक सञ्जालझोगो मो चरी समाजर्वे ताई केझोगो ताईन म्रोल्ले क्होल्ले खले जोब, खले चलिब समाजर तव ताँझोगोलाई समाचार छाप्दीबरी बले ललखामो भिवे उद्देश्य किईमरी चु तालिम ओलेवले अ ।
तमु सञ्चारकर्मी संघ नेपालई अध्यक्ष चित्र बहादुर तमु (लाला)ई प्रमुख आतिथ्यतारी विशेष अतिथि बरिष्ठ सञ्चारकर्मी शान्ती तमु, फोनिज गण्डकीर्वे महासचिव धन बहादुर तमु (सुमन), फोनिज कास्कीई अध्यष पञ्च सुब्ब तमु नि अरु अतिथिझोगोईलाई कोईमरी खावे कार्यक्रम लल । खावे कार्यक्रमरी तालिम किवे समाजर्वे म्रुझोगो ताई न ब्यावमो लोलपरिमु अझ तोरे खवे फ्रेछमिझोगोलाई चु तालिम विईभे अझ छ्याँब तमु भिईमो । खावे कार्यक्रमरी लोब शान्ती तमुई चु लोबलेलाई छनी आथेनु चुलाई खानसम्मन खले तमु कोसिस लदु भिई । छलेई लोब चित्र बहादुर तमुई नि ताई तमुझोगो क्ह्रिइमरी ओसो बढिईभे तमुमे तक्हाईले याखामु चरी सहयोग ललपरिम भिई ।
तालिमरी तमु सञ्चारकर्मी संघ नेपालल्वे सल्लाहकार नि तमु धि नेपालल्वे क्रथे(म्रू) थेवे सञ्चारकर्मी शान्ती तमु, तमु सञ्चारकर्मी संघ नेपालल्वे क्रथे नि कास्की जिल्लाल्ले क्रथे युग तमुई लोमिला । तालिमरी ङच्यु टु जना लोवेम्हिझोगो मल भे तमु भिं नेपालई रोधींहलरी तालिम ओलेल ।
